Todas e Todos á Folga

Folga, Folga, ...Folga Xeral

Por Xosé María Dobarro Paz [*]
26.09.2010

FOLGA, FOLGA... FOLGA XERAL

Para Constantino Trillo, in memoriam, que morreu triste e deprimido por acoso laboral

"Contra o paro, contra o capital, folga, folga... folga xeral” berrabamos algúns “inxenuos” hai trinta anos cando nos estaban a desmantelar as industrias da comarca. E acudiamos, puntualmente, ás manifestacións que moitas veces finalizaban no desaparecido estadio do Inferniño. E as súas gradas estaban case –ou máis– cheas que cando xogaba o vello Racing. Naqueles tempos, xa un algo afastados, Tino Trillo era profesor nun instituto de Ferrol e militaba nun dos partidos comunistas escindidos do PC. Andaba sempre coas bandeiras republicanas nas costas e tiña un certo seguimento de xente nova. Tamén algunha de máis idade. Recordo que sempre se poñían na cola das manifestacións para entrar no estadio coas súas bandeiras, dar unha volta á pista de atletismo e subir á torre de maratón colocando a súa –a nosa– insignia. ¡Onde van eses tempos! Folgas xerais que nesa altura houbo que facer. Manifestacións continuas que a xente seguía. E case todas contra o PSOE, a besta negra ó servizo do capitalismo neoliberal. Non, como din os ligh, os supostos modernos, os que –segundo se di, que eu non o creo– chupan de todo aquí e acolá e os que se enriqueceron ilicitamente –eu tampouco o creo– nalgures e nallures. Saberano eles. E que vaian ó ceo libres de pecado. Tino Trillo, como tanta outra xente, acabou crendo neste persoal autodenominado socialista. E por esas andaba cando se lle botaron enriba. Naturalmente, a dereita fascistoide que padecemos. Supoño que actuarían correctamente, porque neste estado de dereito sempre todo se fai ben e acorde coa lexislación vixente. Se Tino vivise iría, con certeza absoluta, á folga do 29. Malia que tivese relación ou militancia no PSOE. Eu, aínda que ese día non teño docencia, tamén vou ir. E quero que me desconten a parte salarial correspondente, que, é moi posible vai ser unha cantidade importante. Máis ou menos 200 euros. Pero a violencia coa que nos está tratando este goberno ós traballadores, que vén sendo unha continuación da de Aznar, á súa vez seguidista da de Felipe González, e a connivencia co gran capital esixe que haxa que dar contestación, e firme e convincente. E, se for posible, moi maioritaria. Canto máis cedamos, máis nos van machacar. De plantarmos cara, se cadra, algo se pode parar. As eleccións municipais –e varias autonómicas– están á beira. Eles verán o que fan. Acabar nos brazos dun PNV que é a dereita pura e dura –amigos do BNG na Galeuscat, por certo– para aprobar uns orzamentos antisociais é grave. Moi pernicioso.

Síntome moi comprometido co proxecto da refundición da esquerda. Paréceme fundamental, pouco para min pero moito para meus fillos, meu neto, meus amigos e amigas máis novos e para a xente que está aí detrás de nós. E por iso o reproduzo:

“A asemblea comarcal de Ferrolterra manifesta o seu apoio á folga xeral convocada para o vindeiro 29 do presente mes polas confederacións sindicais de Comisisóns Obreiras a Unión Xeral de Traballadores e a Confederación Intersindical Galega. Esta asemblea defende a necesidade dunha folga xeral para deter a ofensiva do neoliberalismo que no Estado español e no conxunto da Unión Europea estase a traducir nos axustes económicos brutais inxustos socialmente e regresivos laboralmente.

O goberno español está a poñer o poder político ao servizo do capital poñendo en bandexa a posibilidade do desmantelamento completo do estado de benestar e das conquistas sociais derivadas da loita secular do movemento obreiro. Un estado de benestar e unhas conquistas que, cos seus sistemas de educación e sanidade, pensións e protección social, salarios mínimos e dereitos sociolaborais básicos, implican unha certa redistribución da renda exercida polo Estado que, de non facerse, contriburía a aumentar o proceso de acumulación de capital. Eis o que se pretende: nin máis nin menos que esa porción de renda sexa trensferida ás mans do capital.

Ante esta situación a asemblea comarcal de Ferrolterra de Refundando a Esquerda fai un chamamento á participación na folga xeral e convoca a facer un esforzo a prol da unidade sindical”.

[*] Xosé María Dobarro Paz (Ferrol, 1950), é catedrático de Lingua e Literatura Galega na Universidade da Coruña.

Publicado no Diario de Ferrol - 26.09.2010

O direito à folga nom existe

Por Lupe Ces Rioboo
26.09.2010

De manhá, de tarde ou de noite, nas ruas e nas casas, nos postos de trabalho... todo o mundo participamos ou escoitamos estes días conversaçons sobre a folga que está convocada para o próximo 29 de Setembro. Nom estou a falar das horas e horas de campanha antisindical e antifolga, desenvolvidas polos medios de comunicaçom, preocupados por umha suposta violaçom do direito a ir a trabalhar, direito que se lhe nega em todo caso a mais de 220.000 na Galiza e catro milhons e médio de pessoas todos os días no estado espanhol, e por uns serviços mínimos, que ocupam o lugar que deveriam protagonizar os agentes convocantes da folga e o debate sobre a reforma laboral e das pensons, que tanto vai marcar as nossas vidas e o nosso futuro. Tampouco me estou a referir a esses tertulianos regurgitadores, na súa maioria, do prefabricado pensamento único, senom às conversas onde se discute se se vai a apoiar à folga, como se vai a organizar o día, que se opina dos sindicatos, e que esperança hai de cambiar as cousas ... porque isso sim, todo o mundo coincidimos de que a cousa pinta mal.

Se bem é certo que o meu pulsómetro de opiniom é bem reduzido, e que só se vê ampliado polas experiencias e comentários sobre outras conversaçons escoitadas pola gente que à sua vez fala comigo, vou dar o meu testemunho sobre o que levo vivido estes dias e que se condensa numha soa frase “O DEREITO À FOLGA NOM EXISTE NA MAIORÍA DOS POSTOS DE TRABALHO”, e só, a valentia e convicçom de muitos trabalhadores e trabalhadoras vai fazer possível que o 29S podam cumprir-se minimamente os objetivos de mobilizaçom.

Os tertulianos e algumhas tertulianas, todos estes días vozeavam que se os sindicatos conseguiam parar o transporte público, a folga estaria ganhada, dando a entender que era doado acadar o seu objetivo, como dicindo “assim qualquera fai umha folga geral” , quando em realidade, o destacável é que só no sector público e tamém, ainda que em menor medida, na grande empresa que concentra um número significativo de empregados e empregadas num só centro de trabalho, com comités de empresa fortes, com anos de experiencia organizativa, os trabalhadores e trabalhadoras podem ir à folga com um mínimo de garantías. No resto de empresas, quitando honrosas excepçons, a chantagem, a coacçom, o medo ao despido e às represálias, estám instaurados no dia a dia da vida dos trabalhadores e trabalhadoras.

Este é o verdadeiro termómetro democrático da sociedade que temos neste momento. A reforma laboral, a reforma das pensons, as medidas económicas... nada disto estava nos programas eleitorais dos partidos, e menos do partido que exerce no governo espanhol. Todas estas medidas forom inspiradas e exigidas por organismos internacionais (FMI, BM, Comissom Europeia...) que nunca fôrom elegidos democraticamente e nunca pugérom baixo a soberania popular a aprovaçom das suas políticas de “reajuste estrutural”.

Se preguntamos à maioria das pessoas em idade de trabalhar se quere que se aumente a idade de jubilaçom, a resposta seria maioritariamente negativa. O mesmo sucederia se se pergunta polo modelo de despedimento, polo tipo de contrato, polo salario mínimo, pola quantia das pensons, …

Outra pergunta que aclararia muito a situaçom seria a consulta sobre a banca pública, ou em que medida tenhem que aportar ao benestar social as grandes fortunas. E como essa, outras muitas que realmente fixeram aumentar a participaçom cidadá na aprovaçom de políticas públicas que tanto influem na vida e saúde das pessoas. Porque estamos falando da diferença entre viver umha vida laboral tranquila, enfrontando só os problemas que vam xurdindo dia a dia, que nom som poucos, derivados da própria atividade laboral, e o viver como se vive agora, por umha importantíssima porcentagem da classe trabalhadora, co medo ao despido, sem esperança pola escassez de emprego e aturando humilhaçons e chantagem, unido a prolongadíssimas jornadas laborais que já está tendo um efeito devastador nesta geraçom em quanto a enfermidades, acidentes e esperança de vida ...

Todo isto se desprende das conversas destes dias “se vou à folga, o xoves me chamam à oficina e dam-me o finiquito”; “agardaremos aos piquetes, fechamos e logo volvemos a abrir, isso é o que nos mandam”; “se perdo o posto de trabalho a onde vou?”; “como aqui tenhem moi difícil que poidamos vir trabalhar, obrigarom-nos moi amavelmente a colher vacacións”... Isso é o que hai, e me ratifico NOM EXISTE O DIREITO À FOLGA.

Dos sindidatos, das suas políticas, do que temos que cambiar em todos eles, nos nossos e nos que nos som alheos... hai que falar depois do 29S, agora unidade, unidade, unidade sindical fronte ao Capital.

Organizacións do Movimento Social de Ferrol Terra, convocan un Acto Público de apoio a todos os sindicatos na Folga Xeral do 29S - Concentración o Luns, 27 de Setembro frente ao Edificio da Xunta

Representantes de diferentes entidades da nosa Comarca, que pertencen ao movimento social, veciñal e cultural, viamos a necesidade de contribuír, na medida que podamos a apoiar ao movimento obreiro, na loita contra a ofensiva do Capital contra a Clase Traballadora, plasmada en medidas económicas, fiscais e laborais que o Goberno Español e a Xunta de Galicia promoven e aplican e que nos rouban dereitos e conquistas sociais e laborais.

Desde o movimento social, non podíamos quedar parados ante tanta inxustiza. Queremos contribuír ao cambio na correlación de forzas, queremos que a Clase Obreira -a inmensa maioría social- ocupe un lugar social e politicamente predominante, non podemos perder dereitos, non podemos deixar que baixo a escusa da "Crise" apliquen toda unha serie de políticas neoliberais que nos empobrecen e nos condenan ao paro e á precariedade laboral. Baixo a máxima de "Privatizar os Beneficios, Socializar as Perdas", o Capital e os seus aliados nos gobernos de Zapatero e Feijóo queren-nos impor as políticas neoliberais. Trata-se pois de paralizar estas políticas regresivas en dereitos e avanzar en políticas de xustiza, de solidariedade, de colaboración, de reparto da riqueza, de reparto do traballo, ... E por isto polo que algunhas entidades do movimento social de Ferrol Terra, elaboramos un chamamento -que achegamos a continuación- para apoiar a todas ás organizacións de clase na convocatoria da Folga Xeral do 29 de Setembro e convocamos a un acto público que imos celebrar o vindeiro Luns, 27 de Setembro, ás 7 da tarde na Praza Amada Garcia de Ferrol, diante do Edificio Administrativo da Xunta de Galicia.

Difunde e Participa !!

29S Folga Xeral

Escoita as razóns!! acode á concentración do próximo luns, 27 de setembro ás 19hs. fronte ao Edificio da Xunta.

Que persegue a Reforma Laboral?

1. O despido máis fácil e barato, e cambiar emprego fixo por eventual.
2. Atacar aos parad@s e privatizar a contratación laboral.
3. Favorecer aínda máis os abusos do empresariado.
4. Atacar a existencia mesma da negociación colectiva.
5. Favorecer, en maior medida, a precariedade do emprego.
6. Abrir o camiño á redución das pensións e o número de beneficiari@s das mesmas.
7.Reducir a capacidade de defensa da clase traballadora, debilitando aos sindicatos.


Tócanos a todos e todas defender as nosas conquistas sociais en perigo, apoiando a todos os sindicatos na convocatoria da Folga Xeral.


Temos que ir á Folga para ...

1. Acabar co medo ao despido.
2. Acabar co paro mediante a creación de postos
de traballo sen precariedade nin despidos.
3. Traballar menos horas para traballar todas e todos
4. Gozar de pensións dignas e con futuro.
5. Ter un ensino e unha sanidade públicas de calidade.
6. Conseguir maiores ingresos fiscais procedentes do capital.
7. Democratizar a economía e a empresa.

Secunda a Folga do 29S

É hora de actuar con responsabilidade e promover un movemento social masivo para recuperar as políticas de progreso e reconstruír as expresións políticas de esquerda que consoliden estas conquistas no noso país e en toda Europa: non te lamentes logo.

Convocan as organizacións sociais, veciñais e culturais de Ferrolterra: Asociación Cultural "Fuco Buxán", Asociación Cultural "Lefre de Caldereta", Asociación Veciñal "O Rosario-Inferniño", Colectivo "Ártabra 21", Colectivo Sociocultural "A Revolta de Trasancos", Fundaçom Artábria.

Nota: Clicar acima da imaxe para ampliar

Baixar ou acceder aos ficheiros das Folhas Informativas da convocatoria en formato -pdf, para copiar e difundir.

En B/N:

docs.google.com - Folleto - o 29S e o Movimento Social [En B/N]

A dúas cores:

docs.google.com - Folleto - o 29S e o Movimento Social [Dúas Cores]
_______________________

Enlace relacionado:

Blogue de Ártabra 21

Folga Xeral do 29 de Setembro de 2010

http://sindicalismo-sindicatos.blogspot.com/
__________________________

Actos para hoxe -mércores 22 de Setembro- para explicar as razóns para ir á Folga Xeral o 29S

Hoxe 22 de Setembro [Mércores] terán lugar o seguintes actos organizados para explicar os motivos e razóns para ir á Folga Xeral o vindeiro 29 de Setembro:

• Mércores, 22 de Setembro: As centrais sindicais CIG, CCOO e UGT, realizarám un acto sindical ás 2 da Tarde no Hospital Xeral de Caranza "Juan Cardona", cunha clara, pedagóxica e combativa presentación a cargo de Lois Méndez Pérez, membro da Executiva Nacional da Federación da Sanidade da CIG -Cig-Saúde.
  
  
• Martes 22 de Setembro: CCOO de Ferrol organizan un novo Acto Sindical aberto a todo o público, no Centro Cultural Carvalho Calero do Inferniño, ás 5 da Tarde, onde participará o Secretario de Acción Sindical da Executiva Confederal, Ramón Gorriz.
  
  
• Mércores 22 de Setembro: A CIG-Servizos organiza un Acto Sindical ás 8 da tarde no Salón de Actos da sede social de Ferrol [Rúa Edurado Pondal, 41-43], coa participación do Secretario Nacional, Paulo Rubido Bará.Ir á web
  
  

Enlace relacionado:

Blogue de Ártabra 21

Folga Xeral do 29 de Setembro de 2010

http://sindicalismo-sindicatos.blogspot.com/
__

Acto Sindical da CIG-Servizos o 22 de Setembro en Ferrol - Preparando a Folga Xeral do 29S

O Sector Servizos (limpeza, hostalería, comercio, servizos públicos privatizados, ...) é un dos máis afectados pola precariedade, tanto nas condicións laborais como pola contratación, onde se transgriden con máis facilidade as normativas que nos amparan fronte aos abusos patronais (xornadas laborais interminábeis, salarios máis baixos que o que marca o convenio, continuos despedimentos improcedentes, descontinuidade, temporalidade, acoso laboral, falta de prevención, ...).

Na nosa comarca o paro aumenta de forma desproporcionada, moi por encima da media galega e estatal. É necesario a intervención dos poderes públicos para paliar semellante declive que estamos a vivir no día a día. A protección ás persoas desempregadas e a creación de emprego público tórnanse máis que necesarias. Na Federación Comarcal de Servizos, con máis de 1600 afiliad@s, coñecemos os pormenores desta situación, empresa por empresa. Pois a nosa acción sindical ten que atender diariamente moitos conflitos pequenos e algúns grandes (Neira&Ortegal) derivados da actitude dos empresarios que, na defensa dos seus intereses e privilexios, condenan a clase traballadora á pobreza. De continuar así, a precariedade social vaise facer aínda máis visíbel.

E diante desta situación, como nos respostan os gobernos (o Central e o da Xunta)? Pois con máis políticas neoliberais. O Goberno Español, con medidas antisociais, unha contrarreforma laboral con grandes perdas de dereitos e favorecedora da patronal, empresarios e capital; con importantes recortes nas prestacións sociais; anunciando importantes recortes no dereito a acceder a unha pensión digna, ... E a Xunta de Galicia, con grandes perdas no salario social reducindo o gasto en prestacións dos servizos públicos, sanidade, educación, vivenda, ...

Diante desta situación, o vindeiro 29 de setembro, está convocada unha Folga Xeral e unha Xornada de Loita Europea, tanto pola nosa Central Sindical como por outras. A Folga Xeral ten que valer para cambiar a correlación de forzas, temos que parar esta orxía neoliberal e frear as políticas contra a clase traballadora que o movemento obreiro saia fortalecido fronte ao Capital. Necesitamos un novo modelo social, baseado na colaboración e na solidariedade, onde a clase traballadora teña máis peso que o Capital, pois somos a maioría da poboación. Necesitamos unha economía democratizada, onde o prioritario sexan as persoas e as súas necesidades, non a cobiza duns poucos que enchen os seus petos co noso esforzo e traballo. Necesitamos un modelo social, onde a política non sexa controlada polos especuladores e xestores dos mercados e da grande banca, e si polos pobos. ... Polo que a Executiva Comarcal de CIG-Servizos vai redobrar o seu esforzo para camiñar até conseguir estes obxectivos.

Dentro da actividade a desenvolver, para preparar a Folga Xeral, a Executiva Comarcal da Federación decidimos organizar unha charla-debate, á cal convidamos ao noso Secretario Nacional, o compañeiro Paulo Rubido Bará. O obxectivo deste acto é, en primeiro lugar, analizar até que punto é negativa esta reforma laboral para os nosos intereses como clase traballadora e o que significa de perda de dereitos (facilita e abarata aínda máis o despedimento, ataca as persoas desempregadas, privatiza os servizos de emprego, precariza aínda máis o traballo, ataca a negociación colectiva, ...) e en segundo é ultimo lugar, ver por que temos que ir ao paro o 29 de setembro.

Aínda que este é un acto sindical, vai dedicado principalmente ás traballadoras e traballadores do sector servizos, é público para quen quixer acudir ao mesmo.

CIG-Servizos Ferrol

A CHARLA-DEBATE SERÁ O MÉRCORES, DÍA 22 DE SETEMBRO, ÁS 20:00 HORAS NO LOCAL DA CIG- FERROL

_____________________

CCOO e UGT convocan este Luns, 6 de Setembro -en Ferrol, un acto informativo dirixido ao movimento asociativo, para preparar a Folga Xeral do 29S

ASAMBLEA DE CCOO E UGT PREVIA FOLGA DO 29S

Ola a todos,

remítovos unha convocatoria de CCOO e UGT Ferrol para que vos sumedes a convocatoria dunha nova asamblea para falar da Folga Xeral do día 29 de Setembro,

A CONVOCATORIA DA ASAMBLEA

O LUNS, 6 DE SETEMBRO, ÁS 11:00 HORAS, NO SALÓN DE ACTOS DA U.C DE FERROL [Unión Comarcal de Ferrol de CCOO, na rúa María, 42-44 baixo.]

AGARDAMOS CONTAR COA VOSA NECESARIA PRESENCIA

UNHA APERTA,

XULIO ABELLEIRA, SECRETARIO COMARCAL DE CCOO
CÉSAR FRAGA, SECRETARIO COMARCAL DA UGT

Estimados veciños e veciñas desta comarca:

Unha vez máis, poñemonos en contacto cos vós, a través das asociacións culturais, entidades veciñais e deportivas que compoñen o tecido asociativo da nosa comarca, as terras de Ferrol, Eume e Ortegal, para chamar a vosa atención sobre a complexidade da situación e actual, e pedirvos a vosa implicación na folga xeral convocada para o vindeiro 29 de setembro.

Neste contexto de crise e demprego, coa nosa comarca por riba dos 16.000 parados, o goberno central vén de dar un xiro a política económica e social do Estado, cedendo as presións das organizacións empresariais como a CEOE e promovendo medidas de durísimo recorte sociais que son inxustas e ilexítimas, tan erradas como impopulares, xa que no canto de minimizar os fortísimos efectos da crise –paro, despedimentos, recortes salariais, precariedade- non fan, senon, agravalos.

Engadir que, en ningún caso, ningunha destas medidas gubernamentais serve para por freno a precariedade e mellorar a empregabilidade, o que nos e afonda no mesmo círculo vicioso de desemprego e miseria.

Os sindicatos CCOO e UGT estamos apurando a nosa rolda de contactos cos comités e entidades sociais da zona na procura do compromiso e da implicación do conxunto da sociedade civil, de todos os traballadores, nesta importante mobilización estatal, a que nos achegamos nun momento crítico.

Como sabedes, o lema da convocatoria da folga xeral é o grito “Así non”. Esta a idea que tratamos de transmitir e simplificar para que cale e se enraíce no conxunto dos veciños e veciñas desta comarca, traballadores e parados, xoves, mozas, empregadas temporais, prexubilados e pensionistas é ben simple: Así non. Nestas verbas se resumen unha extensa lista de razóns e motivos que nos levan a este punto de avanzar cara a folga xeral, para amosar o noso rexeitamente frontal a esta agresión brutal os nosos dereitos laborais.

É así, na antesala da folga xeral convocada o vindeiro 29 de setembro, UGT e CCOO coidan que é totalmente imprescindible reunir as forzas vivas e os cidadáns desta comarca para falar da necesidade de dar unha resposta contundente ante este agravio sobre os dereitos laboriais que tantos anos e tan duramente tardamos en conquerir.

Con este fin, vos emprezamos a participar nunha asamblea o día 6 de setembro, ás 11:00 horas no salón de actos da Unión Comarcal de CCOO en Ferrol.

Agardando a vosa presencia e compromiso,

Unha forte aperta,

César Fraga 

Secretario Comarcal da UGT

Xulio Abelleira
Secretario Comarcal de CCOO
_________________

O vindeiro Luns, 6 de Setembro, vai ter lugar un importante acto en Ferrol, para analisar a necesidade da Folga Xeral do 29S

"¡Folga Xeral!, para defender os dereitos das traballadoras e traballadores"

Xa a principios de Xullo, a AC "Fuco Buxán" organizara unha interesantisima chala no Centro Cultural Carvalho Calero, con Antoni Doménech e Camilo Nogueira, daquela falaba-se se era "necesaria a Folga Xeral ....?". Aquel acto despertou moita espectativa polo que a presencia de persoas interesadas foi moi importante. Desta vez, a activa asociación ferrolán, organiza esta conferencia-debate con tres activistas históricos, e de primeira liña, do movimento obreiro:

• José María Zufiaur foi un dirixente da central sindical UGT e actualmente é director de Labour, director técnico do Departamento de Relacións Laborais e Internacionais do IERI da Universidade Complutense de Madrid e conselleiro do Comité Económico Social da Comunidade Europea.
  
  
• Manolo Lago, economista do Sindicato Nacional de CC.OO. de Galicia, membro do seu Gabinete Económico e autor de numerosos estudos sobre o "Mercado Laboral", Emprego, ... e de coxuntura socieconómica.
  
  
• Manuel Mera Sánchez, activista do sindicalismo nacionalista desde os seus inicios no ano 1974, foi Secretario Xeral da INTG e Presidente da CIG. Analista do IGADI e articulista de opinión.

O Acto terá lugar o Luns, 6 de Setembro de 2010, ás 7 da tarde, no Salón de Actos da Fundación Caixa Galicia, no Cantón na Praza da Constitución de Ferrol.

fuco buxán, a.c.
Aptdo Correos 240 C.P. 15400 Ferrol
Telef. 981325492
www.fucobuxan.com
fucobuxan@yahoo.es
_____________

CCOO e UGT convocan para este Venres, 3 de Setembro, ás 12 do mediodía, unha Asamblea Aberta a toda a cidadanía no Centro Cultural Carvalho Calero, do Inferniño co obxecto de explicar e razonar os motivos que xustifican a Folga Xeral do 29S

Chegado xa o mes de setembro, atopámonos na antesala da folga xeral convocada para o vindeiro día 29 de Setembro.

Nestas datas, os sindicatos CCOO e UGT estamos apurando a nosa rolda de contacto co calendario na man, e traballando, cóbado con cóbado, cos comités de empresas máis significativos e numerosos das nosa comarcas: Ferrol, Eume e Ortegal, na procura do compromiso e da implicación do conxunto da sociedade civil, de todos os traballadores, nesta importante mobilización estatal, a que nos achegamos nun momento crítico.

Como sabedes, o lema da convocatoria é o grito “Así non”. Esta a idea que tratamos de transmitir e simplificar para que cale e se enraíce no conxunto dos veciños e veciñas desta comarca, traballadores e parados, xoves, mozas, empregadas temporais, prexubilados e pensionistas é ben simple: Así non.

Resume unha extensa lista de razóns e motivos que nos levan a este punto de avanzar cara a folga xeral. Así non se sae da crise; Así non se crea emprego estable e de calidade que poña freo a caída da economía. Así non se busca unha saída conxunta, lóxica e coherente a crise.

Nesta situación, o governo central, está a dar un xiro a súa política social, cedendo as presións das organizacións empresariais como a CEOE e promovendo medidas de durísimo recorte sociais que son inxustas e ilexítimas, tan erradas como impopulares, xa que no canto de minimizar os fortísimos efectos da crise –paro, despedimentos, recortes salariais, precariedade- non fan, senon, agravalos. Hai que engadir que en ningún caso, ningunha destas medidas gubernamentais serve para por freno a precariedade e mellorar a empregabilidade, o que nos e afonda no mesmo círculo vicioso de desemprego e miseria.

Con esta convocatoria de folga, os sindicatos queremos amosar o noso rexeitamento frontal a esta brutal agresión contra os nosos dereitos, os dereitos dos traballadores e traballadoras. Coidamos que nesta situación se está a producir o recorte de dereitos social máis sangrante nos últimos tempos, asi como un significativo retroceso do estado de benestar que tantos séculos de sangue e suor nos levou conquerir.

CCOO e UGT convocan para o vindeiro venres, 3 de setembro, ás 12:00 horas, unha asamblea aberta a toda a cidadanía no centro cultural Carvalho Calero, do Inferniño co obxecto de explicar e razonar as razóns que xustifican esta folga e lograr o respaldo dos veciños de veciñas da nosa comarca. Intervirán Toni Ferrer, secretario de Acción Sindical da UGT e Ramón Gorriz, secretario confederal de Acción Sindical de CCOO.

Agardamos contar coa vosa presencia e colaboración.

Ferrol, 1 de setembro do 2010.-

UGT e CCOO

ASAMBLEA UGT E CCOO, previa a FOLGA XERAL do 29 de setembro

Toni Ferrer (UGT) e Ramón Gorriz (CCOO)

ABERTA A CIDADANÍA

VENRES 3 DE SETEMBRO

12:00 HORAS

Centro Cultural Carvalho Calero

Sindicato Nacional de CCOO de Galicia - CCOO
Unión Xeral de Traballadores en Galicia - UGT
___________________